Isi syaghiwe apa abandu abakufumila kufipatala ifinandi ifya Fulirwa,Hara na Lwezga basosisye ikilatasi ukubula ikaselo iya Karonga ukuti yighomosye ifyombo ifi fyulisiwe ukusita ukukongesya imbatiko.
Nukuti ifyombo ifi abandu aba bikufilonda ukuti fighomokela bo ifitukutuku ifi fyabikiwe fipatala fyabo ifi fyulisiwe kangi ni ghali ilya Ambulance ili fyabikiwe pa kipatala ikinywamu ikya Karonga nukuti fyabikiwe nikibughatila ikya FOCUS nikyolondiwa ikya kutula abayuba pa masyo agha bufyele ubununu.
Pakuyobapo pa umalikisyo ubwa kubala ikilatasi iki Zebedia Mvula ukufumila ku kipatala ikinandi ikya Fulirwa atile bikulonda ukuti ikaselo iya boma lya Karonga yilingania ubwanaloli ukufwana nakaghulisyilo kafyombo ifya fipatala ifi fyabikiwe nifibughatila nukuti kangi bati ikibughatila ikya kwenesyua isya mahongo (Anti-Corruption Bureau) kingililepo pa masyo agha ukuti ubwanaloli buboneke.
Pakwamulapo pa masyo agha uwapakikota uwa kaselo iya boma lya Karonga Belium Msukwa atile batendekisye ulubatiko ulwa kulisya ifyombo ifya fipatala ifi fitikubomba imbombo okongelelpo ifitukutuku na maghali agha ghonangike ukuti indalama babombele imbombo isingi nukuti ulubatiko ulu bapilikene ikinja ikya 2021 ukuya kaselo.
Msukwa atile linga ifibughatila fibikile ubutuli ubwa fyombo fipatala bukuya maka gha bafipatala pamo kaselo,nukuti bati ukuya kaselo bope baswile nukulisiwa ukwa ighali ilya Ambulance papo bati palubatiko ulwa kulisiwa likalipo umma.
Nukuti bati yope inesisye kuti abakulumba kulumba aba pakipatala ikya Karonga bo aba bulisye ighali ilya Ambulance ili loli bati yope unkulumba uwa kipatala ikinywamu ikya pa boma lya Karonga Davied Sibale akanile atile akasimanya nasimo ukuti ighali ili lyulisiwe.
Uwakusimba-Austin Sute Kayisi