Ayobile amasyo agha yo yumo mwa bakulumba kulumba ukufumila ku kibughatila ikya kumanyisya abandu ifindu ifya kukindana kindana kisu muno ikya National Initiative for Civic Education -NICE Freency Mapanga pa lukomano ulwa bapelelesi aba ku kighaba ikya ku mpoto ikya Nyika Media Club.
Umwene atile ukufwana na kabalilo aka tulimo liilino amasyo agha pa internet kabalilo kingi ghatakuya gha bwanaloli papo ghitikuya nubuketi polelo syakulondiwa ukuti abapelelesi babaghile ukukongesya nukusimba amasyo agha bwanaloli agha ku babula abandu isya bwanaloli.
Mapanga atile kangi isi singatula fiyo ukuti abandu bafikiliweghe nu bufumusi ubwa bwanaloli apa ikisu iki kikulabila ku fisalo nkabalilo aka abandu bikusubila abapelelesi pakubwagha ubufumusi ubwa bwanaloli.
Pakuyobapo uwa pakikota uwa kibughatila ikya bapelelesi ku kighaba ikya ku mpoto ikya Nyika Media Club Feston Malekezo atile abapelelesi bali ni mbombo unywamu fiyo pakabalilo aka kisalo pakwenesya ukuti bikubomba imbombo yabo mwabupakasi pakusimba amasyo ghabo agha bwanaloli.
Nukuti pa lukomano ulu ikibughatila ikya bapelelesi ikya Nyika Media Club kisalile Towera Katsiri ukuya wakibili ku wa pakikota uwa kibughatila iki ukupyanila mbuyo ubwa Alepher Kasongo uyu kwalino asamile nkindoli ikya Lilongwe
Uwakusimba-Austin Sute Kayisi