Ayobile isi yo wapakikota uwa bapelelesi mwi boma lya Karonga ku kabughatila aka Karonga Press Club Adams Wundaninge pa umalikisyo ubwa lubatiko ulwa kubyala ifipiki ifya kufwana 100 pa sukulu iya Mwenitete primary ku ntemi Kilupula ulu akabughatila ka katendekisye.
Wundaninge atile abapelelesi babaghile ukwegapo fiyo bope akagaba ukubyala ifipiki nukupakikisya kangi nukumanyisya abandu ubununu ubwa kubyala ifiki ukufwana nukonangika ukwa fipeliwa yo nongwa bope beghilepo akagaba akakubyala ifipiki ifi pa sukulu iyi.
Nkuti asumile abamanyisi ukuti bandu bakupakikisya ifipiki nikyolondiwa ikya kuti fikule kanunu.
Pakuyoba unkulumba uwa sukulu iya Mwenitete primary Rachael Munthali andaghisye fiyo abapelelsi aba ni fipiki ifi babyele pa sukulu papo bikuya pakugomokesyapo ikipeliwe papo pa sukulu iyi ifipiki fitumuliwe fiyo isi atile bikuya pakwenesya ukuti ifipiki ifi fikupakikisiwa.
Nukuti atile kangi pa sukulu iyi pali indamyo isya kukindana kindana bo ukusita nifyumba ifya kubamanyilila ifyakufwana kangi nifyakwitughalila abana papo pa sukulu iyi pali bana bakufwana 1,048 loli bati bingi bikwitughala pasi itolo
Pakuyobapo uyu alimilile ofesi iya fipeliwa mwi boma lya Karonga Mathero Phiri atile imbombo iya kubyala ifipiki yikwenda kanunu mwi boma lya Karonga papo bali nulubatiko ulwa kubyala ifipiki ifya kufwana 1.5 million mwi boma ili nukuti kwalino ifipiki 784,561 fyo ifi fibyaliwe
Ulubatiko ulwa kubyala ifipiki ifi lubombiwa nubukolelanisi ukufumila ku ofesi iya nkulumba uwa boma lya Karonga DC Willard Mwambo,ofesi iya fpeliwa mwi boma ya Karonga kangi na ba UDK Consultancy.
Unsimbi-Austin Sute Kayisi
