Ulubatiko ulu lubombeliwe kwa Mwalafyale Mwankenja kwa Filawule ku ntemi uwa batemi Kyungu mwi boma ili apa akakundi aka kaya aka Wiyule Irrigation Scheme kapeliwe ingongole iya ndalama isya kufwana 30 million kwacha.
Pakuyobapo pakablilo akakwikakikisya ulubatiko ulu unkulumba uwakwenesya isya kyuma ku kibughatila ikya National Economic Empowerment Fund-NEEF Benedicto Kananzi atile ukuya kibughatila ikya NEEF bikubika ingongole isya kukindana kindana okongelelapo isya bulimi nkabalilo akakusiku na pa lumu.
Nukuti atile bikulonda ukufikila abalimi bakufwana 200,000 pa bulimi ubwa konenele tughaba tubili bo ukwanda umwesi uwa April na July kangi na August ukufika December pakubika ingongole ku balimi ukufwana nulubatiko ulwa ndalama isya kufwana 100 billion kwacha isya lubatiko ulu nukuti bikubika bo imbolera,imbeyu kangi na solar pump.
Umwene atile ukufwana nubwikakikisye ubwa lubatiko ulu asumile abalimi ukubuka ku ma ofesi ghabo ukwakwegha ingongole isya bulimi nikyolondiwa ikya kuti balime ukuti ifyakulya fyaghiwe kisu muno.
Pakuyobapo uwapakikota uwa kakundi ka Wiyule Irrigation Scheme Bertha Mogha atile bali nubuhobofu fiyo papo kwalino bikuya pakulima pa bunywamu ukuleghanisya na muno balimilagha ku nyuma uko nongwa iya fyombo ifya bulimi ifi bapeliwe nikibughatil ikya National Economic Empowerment Fund-NEEF.
Loli atile kubuyo ubu bali ni ndamyo bo iya kusita ukuya ni network kang na magesi ifi bati fikuya pakufulangani fiyo pa funjo wabo.
Uwakusimba-Austin Sute Kayisi