Ukwendela ku wakwimilila inongwa kulubafu ulwa boma Prosecutor Sub Inspector Yollam Kanyenda alibulile ikolotI ukuti pa 17 March 2025 nakabalilo ka aka ku mayolo nkaya ka Malopa udumyana abukile ukunegha amisi pa kisoko uku ayekwaghana na Thomson Sikaona uyu alikolile udumyana uyu nukutika pa kyeni nukugwisya kangi pasi pakutaba amalundi.
Nukuti abandu abakulondela ifinunu balipimbile umwana uyu mpaka ku bapapi bake apa Thomson Sikaona aye kwibwalala nyumba yake pakwipoka bo amenye ukuti abapapi aba mwana uyu bakalele nukuti akoliwe na ba polisi inandi iya Kaporo.
Kabalilo aka mwi koloti Sikaona alitike inongwa iyi nukuti asumile ikoloti ukuti lihobokele pakupa ulutumulilo.
Loli uwa kwimilila inongwa kulubafu boma Yollam Kanyenda asumile ikoloti ukuti libike ulutumulilo ulukafu kwa Thomson Sikaona papo inongwa iya kukoma umundu nu kufulasya ulutumulilo lwake fyo ifinja ilongo limo nubuna (14) nukwakubomba imbombo ingafu ku nyololo.
Umwene atile kangi ukolela pa isi udumyana uyu apilike ububabe ukufikila mpaka aye kughonekiwa ku kipatala ikinywamu ikya Mzuzu Central kwa mwesi ghumo kangi atoliwe nukukindilila ni fimanyilo.
Pakubika lutumulilo First Grade Magistrate Julius Kalambo akolelene nu wa kwimilila inongwa kulubafu ulwa boma nukuti atumwile ukuti Thomson Sikaona akitughale ku nyololo ifinja buna(4) nukwakubomba imbombo ingafu ukufwana ni ndaghilo isya kwendesyela ikisu iki pa kaghaba ka 238 aka penal code.
Thomson Sikaona ikufumila nkaya ka mwalafyale Malopa ku ntemi Kilupula mwi boma lya Karonga.
Uwakusimba-Austin Sute Kayisi