Ukufwana nuketi uwa boma pa nongwa iyi Sergeant Christina Nyondo atile Mwakamogho abombile akayilo akabibi aka ku mwisukulu uyu ukufuma umwesi uwa June 2024 ukufikila umwene uwa February 2025.
Nyondo alibulile ikoloti ukuti yuba uwa mwana uyu balekene nudume uyu ali nawe pa nyegha uyu ali mwana wa tata uyu polelo abukile kumyabo ku bapapi bake nukuti tata uyu alwagilepo ulusako ulwa kugona umwana uyu.
Umwene atile umwana uyu amanyikwe ukuti agoniwe papo alyandile ukutamiwa linga olonda ukubuka ku kibusu nukuti bo alalusiwe na yuba wake alyagiwe ukuti iswile ku buyo bwake ubusisya nukuyoba kwa yuba wake ukuti yo mwisukulu wake agonaga.
Nukuti bati yuba uwa mwana uyu abukile na masyo aga ku polisi iya Kaporo uku babukile nu mwana uyu ku kipatala uku basimikisye ukuti umwana uyu afulele naloli pa kugoniwa.
Pakupeliwa ulusako ukwa kuyobapo mwi koloti Edward Mwakamogho asumile ikoloti ukuti lipeko ulutumulilo ulunandi papo umwene bine kangi kangangale.
Loli uwa kwimila iboma panongwa iyi Sergeant Christina Nyondo atile tata uyu apeliwe ulutumulilo ulukafu nikyolondiwa ikyakuti kiye kimanyisyo kumundu aliwesa uyu ali kayilo bo aka.
Pakubika ulutumulilo Senior Resident Magistrate Ephraim Chikwakwa atumwile ukuti tata Edward Mwakamogho akutugale ku nyololo ifinja ilongo limo nifinja fihano nakimo (16) nu kwa kubomba imbombo ingafu papo isi abombile sikususania ni ndagilo isya kwendesyela ikisu iki.
Edward Mwakamogho ukufumila nkaya ka Mwalafyale Benjamin Chawinga ku ntemi Kilupula mwi boma lya Karonga.
Unsimba-Austin Sute Kayisi
