Isi syobiwe pa fimanyilo ifya masiku mabili ifi ikibughatila ikya Malawi Human Rights Resource Centre-MHRRC kyatendekesyile abanfyale,abanyela,abayuba kangi na batimi.
Pakuyobapo pa umalikisyo ubwa fimanyilo ifi unkulumba uwa kwenesya imbatiko ku kibughatila ikya Malawi Human Rights Resource Centre-MHRRC Layness Soko atile syaghiwe ukuti abana bingi bikufulunganisiwa pa bumi bwabo kangi abana bikubatila abatata babo nongwa iya kuti abatata bitikuya nakabalilo akakwangala nabana babo ifi fyo fikupela ukuti abana bingi bafulunganisiwe kangi babombeghe utuyilo utubibi.
Nukuti atile ukwisa nu fimanyilo ifi ko kukasya abatata,abanyafyale na batimi ukuti baghengepo akaghaba aka kwangala nukumanyisya abanabo papo syo simo sikupela ukuti abana bingi bakweseghe amakombo,banweghe ubwalwa kangi ukwegha bo bakali kakeke nukwegha Inyanda.
Pakuyobapo yumo mwa batimi ukufumila ku kipanga ikya Karonga CCAP Rev Jonathan Mhango atile bandu bahobofu fiyo ukufwana ni fimanyilo ifi bapeliwe ni kibughatila ikya Malawi Human Rights Resource Centre-MHRRC papo fikuya pakubatula na muno banga pakikisya abana paliko na bayuba mu nyegha.
Paumalikisyo umwalafyale SGVH Malema 1 atile isi syamomumo naloli nukuti asumile ukuti ikimila kileke ukufulunangania imbatiko isya pakaya umma loli bati imbombo iya kupakikisya umwana ya yuba na tata ukusita ukudekela mwene yuba umma kangi bati abatata mu nyeghe baleke ukuti baye bandu bakutilisya abanabo linga apa bafikile pamo bali pakaya papo syo simo isi sikupela ukuti abana kabalilo kingi bafulunganisiwe pa bumi bwabo.
Ikibughatila ikya Malawi Human Rights Resource Centre-MHRRC kikubomba ulubatiko ulwa kumasya inyegha isya bana nukufyusya ubwabuke kisu muno ukongelelapo iboma lya Karonga nubutuli ubwa ndalama ukufumila ku Norwegian Church Aid-NCA na Danish Church Aid-DCA.
Uwakusimba-Austin Sute Kayisi