Unjobeli wa police iya Karonga Margret Msiska atile tata uyu yo Patrick Viyuyu wa finja 38 uyu aghiwe na mafuta agha petrol gha bwingi bakufwana 1,120 litres kisita kwitikisiwa.
Viyuyu apinyiwe mwisyughu pa 16 July 2025 kulubunju pa Karonga roundabout.
Msiska atile Viyuyu alimike ubunyali ighali lyake ulya luko ulwa Sienta ili nambala yake yo NE 3971 pa Karonga roundabout nikyolondiwa ikyakuti akwesyemo abandu mwighali ili lyakoliwe na ba Traffic.
Aba traffic bo balyenesisye ighali ili nkati syalyaghiwe ukuti muli ifigubu ifya ma mafuta agha petrol ifya kufwana 56 ifya ma 20 litres.
Nukuti Viyuyu alalisiwe isya mafuta agha isi atoliwe ukunangisya ifikalatasi ifyakwitikisiwa ukuya na mafuta agha isi sipelile ukuti apinyiwe.
Viyuyu ukwakubonekela kwi koloti kabalilo kalikosa ukwakwamula inongwa iya kwaghiwa na mafuta kisita kwitikisiwa ukufwana ni ndaghilo isya kwendesyela ikisu iki pa section 17 pakanandi ka 42 Liquid Fuel and Gases ( Production and Supply Act)
Patrick Viyuyu ikufumila nkaya ka Mwalafyale Chakwera ku ntemi STA Kilupula mwi boma lya Karonga.
Uwakusimba-Austin Sute Kayisi