Bishop Martin Anwel Mtumbuka ayobile amasyo agha palubatiko ulwa kwighulila sukulu iya St Denis Catholic Primary mwi boma lya Karonga.
Umwene atile ukuya Diocese ya Karonga ikyolondiwa ikya sukulu iyi kokufikila nifimanyilo ifinunu ku bana bosa papo bati indalama isi sikuya pakwaghiwa pa sukulu iyi syakutulila ikutendekesyela ma sukulu agha nkaya aghakutamiwa bo kwa Katili na kwa Filaghule.
Umwene atile kabalilo kingi abana aba bikusaliwa ukubuka ma sukulu agha secondary bikufumila mu town mwene koma nkaya fiyo papo mukayamo ifyakumanyilila ifya kufwana bo ifyumba ifya kumanyililamo kangi nifyakwitughalila abana.
Nukuti unkulumba uwa fimanyilo mwi boma lya Karonga Mercy Mayuni andaghisye fiyo Diocese ya Karonga pakuyenga sukulu iyi isi bati sikuya pakutula imbatiko isya Malawi 2063 pa mbatiko isya fimanyilo.
Pakuyobapo umanyisi unkulumba uwa pa sukulu iya St Denis Catholic Primary Eunice Mughogho atile andaghisye fiyo Bishop Martin Anwel Mtumbuka nukwigulila isukulu iyi nukuti abene ikuya bamanyisi bakwiyipa pa mbombo yabo iya kumanyisya abana pa sukulu iyi.
Sukulu iya St Denis Catholic Primary yalyandile pa 16 September 2024 nukuti yili na bana bakufwana 286.
Wakusimba-Austin Sute Kayisi