Pakuyobapo pa fimanyilo ifi ikibughatila iki kyatendekesyile abapelelesi aba kighaba ikya ku mpoto ba Nyika Media Club, unjobeli uwa kibughatila iki Sangwani Mwafulirwa atile batendekisye ifimanyilo ifi ukumanyisya abapelelesi nikyolondiwa ikya kuti abandu baye nubufumusi ubwakubaghililiwa kangi ukubelusya pa isya butungulu isi sikuyobiwa ukupalamasya ifisalo ifya pa 16 September 2025.
Umwene atile syaghiwe ukuti kukufumusiwa ubufumusi ubwa butungulu ubwa kupalamasya makina gha Smartmatic ifi bati fipelile ukuti abandu bamo batoliwe nukusimbisya mulubatiko ulwa mavoti.
Mwafulirwa ongelile ukuyoba ukuti ukufwana na isi bati abapelelesi bakabutula umma abene pakweghapo akaghaba akakubelusya abandu ukwendela mu mbombo syabo isya ukufumusya amasyo.
Nukuti asumile kangi aba fipani bope ukusita ukufumusya isya butungulu isi singapela ukufulungania abandu pa kisalo iki.
Pakuyobapo uwa pakikota uwa kibughatila ikya Nyika Media Club Feston Malekezo andaghisye ikibughatila ikya MEC nukwisa nifimanyilo pakulingania pa bwelu namuno imbombo yikuya pakwendela ukuti bope ukuya bapelelesi babikeghe ubufumusi ubwa kubaghililiwa ku bandu ukufwana ni kisalo iki.
Nukuti asumile yope abapelelesi ukuti babaghile ukwenesya akabalilo kosa ukuti ubufumusi ubu bikubika bukuya bwa bwanaloli.
Ikibughatila ikya MEC kyatendekisye ifimanyilo ifi mwakukolelana na ba Gazette Media.
Uwakusimba-Austin Sute Kayisi