Isi syaghiwe palukomano ulu ikipanga ikya CCAP Synod of Livingstonia pasi pa lubatiko ulwa Early Childhood Development -ECD batemile abakulumba kulumba ba ku kaselo iya boma lya Karonga ni fibughatila ifi fikaya fya boma mwi boma lya Karonga.
Pakuyobapo unkulumba uwa kwenesya ulubatiko ulwa Early Childhood Development -ECD ku Synod of Livingstonia Caroline Kachilika Phiri atile ukufwana namuno babombile ingamano syabo mwi boma lya Karonga syaghiwe ukuti muli indamyo fiyo ku masukulu agha bana abanandi CBCC bo ukusita ukuya nifyumba ifya kubaghililiwa ifya kumanyilamo abana papo fimo bati filendemwike fimo fiwile kangi bati fimo fyalyundu.
Umwene atile kangi mu masukulu gha ma CBCC aba komiti bali ni mighunda iya kulimamo loli bikutoliwa papo batakuya nifyombo ifyakulimila ifya kubaghililiwa.
Nukuti atile kangi ifimanyilo ifi yali yonjila yumo iya kubamanyisya ukuti iboma likuya pakwikakikisya ulubatiko ulwa kwendesyela masukulu agha bana abanandi CBCC kisu muno nukuti bati amasukulu agha ghikwendesiwagh pasi pa bukambala ubwa fimanyilo ukufuma ku bukambala ubwa kusita ukuleghana pakati pa bata na bayuba.
Pakuyobapo unkulumba uwa fimanyilo mwi boma lya Karonga Mercy Mayuni atile masukulu agha bana abanandi CBCC ghakulondiwa fiyo nukuti atile ukwisa ku bukambala ubwa fimanyilo sikuya pakutula fiyo pa fimanyilo fya bana
Paumalikisyo Katoto Kamwera uyu yo nkulumba uwa kwenesya ulubatiko ulwa Early Childhood Development -ECD ku kaselo iya boma lya Karonga atile ulubatiko ulu lukuya pakutula fiyo ukuti abapapi bamanye ukulondiwa ukwa masukulu agha kangi beghengepo akaghaba ukutuma abana ku sukulu isi.
Uwakusimba-Austin Sute Kayisi