Wunduna wa vyaumoyo wamba ntchito yakupereka katemera wa nthenda ya khasa ya nthowa ya chibabilo kuwana awo wakwaniliska vilimika 9-18 musukulu kweniso na muvikaya muchalo chino.

Pakuyoghoya na mulangizi wakufumira pachipatala chaboma la Karonga wa Esterly Nyirenda wati ntchito wayiyamba makola ndipo wati wanthu wanandi musukulu wayipokerera makola ndipo wati wanachigomezgo kuti paumaliro wa kampeni iyi wafikirenge Wana wanandi kuti wapokere katemera wa Human papiloma Virus -HPV ako nkhachibungu kakwambiska nthenda ya khasa ya nthowa ya chibabilo ku wa mama.

Nakuti iwo wasuska vya uheni uliwose wa katemera uyu chifukwa wati walikwamba muchilimika cha 2019 kupokereska katemera uyu ndipo palije uheni uliwose uwo ulikusangikapo ndipo wachiska wapapi,waziliska na mafumu kutolapo lwande kuphalira wanthu kuti wakapokere katemera uyu.

Iwo watiso nthenda ya khasa ya nthowa ya chibabilo njikulu chomene muchalo chino ndipo wanthu wanandi wafwapo chifukwa cha nthenda iyi nchifukwa chakhe boma layezeska kugula katemera uyu kuti wathaske wanthu ku nyifwa izo zikwiza chifukwa cha nthenda ya khasa ya chibabilo.

Wakulemba Thom Tommy Nyirenda.