Isi syobiwe pa fimanyilo ifi ikibughatila ikya kumnyisya abandu ifindu ifya kukindana kindana ikya National Initiative for Civil Education-NICE mwi boma lya Karonga kyandekesyile abayuba abikulonda ukwisa kwima nabo pa fisalo ifi mwi boma lya Karonga.
Pakuyobapo unkulumba uwa kibughatila ikya NICE mwi boma lya Karonga Nathan Sakala atile abene bali nulubatiko ulwa kukasya abayuba ukuti baleke ukwibonela pakweghapo akaghaba pa fikota ifyakukindana kindana pa fisalo ifya pa 16 September ikinja iki yonongwa batendekisye ifimanyilo ifi ku bayuba aba.
Sakala atile apa ikibughatila ikya MEC kili nulubatiko ulwa kwikakikisya ulubatiko ulwa kuhaha abandu pa 14 July 2025 ukufwana ni fisalo abayuba aba syakulondiwa ukuti basimanye imbatiko syabo isya kubabula abandu ifi bisakubabombela linga basaliwe nukuti isi sikuya pakutula fiyo abayuba ukuti bafyuke pa fisalo ifi kangi ukuya fyalutengano.
Pakuyobapo unkulumba ukwenesya isya kusita kuleghana pakati ba mama na abatata (Gender) kwi kaselo iya boma lya Karonga Ireen Mwenelupembe atile syakuhobosya fiyo nubwingi ubwa bayuba aba bikyelile ukwima nabo pakisalo iki sikunangisya ukuti abayuna lino bandile ukwighuka mwi boma lya Karonga pakweghapo akaghaba pa fisalo isi bati fyakuhobosya fiyo.
Pakuyobapo na yumo mwa bayuba aba bikulonda ukwima nabo pa fisalo ifi uyu alipo pa fimanyilo ifi Walinase Mhango uyu ukwimila ku kighaba ikya Lupembe ukuya kasalala pa kipani ikya NPP atile ifimanyilo ifi fyali kanunu fiyo papo fikuya pakubatula ukwikasya palubatiko ulwa kuhaha abandu ukuti bafyuke pafikota ifi bikulonda.
Uwakusimba-Tamandani Kasuka Mboma