Pakuyobapo yumo mwa bakulumba kulumba ukufumila ku ofesi iya Social Welfare mwi boma lya Karonga Henry Mshanga pa lubatiko ulu lwabombeliwagha pa sukulu iya primary iya Kasantha ku ntemi Kilupula atile ulubatiko ulu lwakulondiwa fiyo papo lukubika ulusako ku bana ukuti bayobeghe indamyo isi biwaghana nasyo papo bati abana bikwaghana ni ndamyo fiyo pa bumi bwabo ubwa isiku ni siku.
Umwene atile kangi yikuya njila iyakuti abalongosi abakukindana kindana bapilike isi abana bikuyoba ukuti biyeghe ni mbatiko isya kumasya isi abana bikwilumbusya.
Mshanga atile abana mwi boma lya Karonga bikwaghana ni ndamyo nyingi fiyo bo ukubombesya imbombo ingafu,ukubeghesya abana bo bakali bakeke,ukuyosya abana ukubuka ku kisu ikya Tanzania kangi nukusita ukupakikisya abana.
Nukuti uyu alihesya ugindikiwa pa lubatiko ulu Belium Msukwa uyu yo wapakikota uwa kaselo iya boma lya Karonga atile syamomumo naloli ukuti abana bikwaghana ni ndamyo fiyo nkaya umu bikwitughala polelo ukuya kaselo bali na makomiti ma sukulu na nkaya agha kwenesya isya bwabuke ubwa bana bo pakusita ukubeghesya bo bakali bakeke.
Paumalikisyo yumo mwa bana Tiyamike Msiska atile andaghisye fiyo ikaselo iya Karonga ukwisa ni suku ili papo abene bikwaghana ni ndamyo fiyo pa bumi bwabo polero abapapi babaghile ukweghapo akaghaba ukutula abana pa fimanyilo ukusita ukubeghesya abana.
Ulubatiko ulwa kukumbukila umwana mu Africa ulu lwatendekesiwe ni kaselo iya boma lya Karonga mwakukolelana ni fibughatila ifi fikaya fya boma umma mwi boma ili nukuti untu uwa lubatiko ulu lwali lwakuti “Ukubika ubwabuke ubwa bana pa kyeni mulubatiko ulwa mbombo ni sya kyuma-Tubombilepo isya fiki ukufuma mu 2010″
Uwakusimba-Austin Sute Kayisi