Wupu wa wakuvikilila watolamakani mu chalo chino wa Media Institute for Southern Africa Malawi -MISA Chapter wapempha watolamakani kujifikilila pa umoyo wawo kweniso kupeleka mwawi ku wanthu wakuvota kuyowoya maghanaghano ghawo pa fisalo vya pa 16 September 2025.

Ivi vyayowoyeka pa masambilo aya wupu wa MISA wangunozgela watolamakani wa ku chigawa cha ku mpoto aya wachitikila ku St John of God mu msumba wa Mzuzu.

Pakuyowoya na mlala wakuona ma program ku wupu wa MISA Malawi wa Moses Chitsulo wati watolamakani wakwenela kujifikilila pa umoyo wawo kweniso kupeleka mwawi ku wanthu wakuvota kwendela mu makani yawo aya wakulemba kweniso ma programs yawo.

Iwo watiso watolamakani kanandi umoyo wawo ukuya pa chofyo chomene pa nyengo ya visola kweniso wakulemba chomene makani ya wanthu awo wakupikisana pa visola kuleka wanthu awo wa kuvota.

Wa Chitsulo wati wali nachigomezgo kuti kwendela mu masambilo agha watolamakani wasambila wamanya na umo wangajifikilila kweniso umo wangapelekela mwawi ku wanthu wa ku vota pa visola vya pa 16 September 2025.

Yumoza wa watolamakani awa wanguwapo pa masambilo aya Moreen Soko kufumila ku wailesi ya Tuntufye wati masambilo aya yawavwilenge chomene kujifikilila kweniso ka gwililo kawo ka ntchito pa visola vya pa 16 September 2025.

Wupu wa MISA Malawi wangunozga masambilo aya na ovwili wa ndalama kufumila ku UNESCO Regional Office for Southern Africa.

Wakulemba-Austin Sute Kayisi