Pakuyobapo pakabalilo akakubika ubutuli ubwa ndalama isi Mwalweni atile abandu ababili aba bikubomba ubukyulusi bwabo ubunandi nandi palema bandu bakilema polelo umwene sikyelile ukuti abongelelepo aka ndalama akandi pa bukyulusi bwabo.
Nukuti asumile abanyafyale aba bali pasi pa PGVH Katolola ukuya nimbatiko isya kubatulila abandu aba bali nifilema pa bumi bwabo twaya twabo.
Nukuti asumile kangi ku bapapi aba bikwitughala na bandu aba bapeliwe ubutuli ubu ukuti baye bandu bakubakasya ukuti ubukyulusi bwabo bubuke pakyeni ukusita ukubalelya indama isi.
Pakuyobapo nayumo mwa bandu aba bambilile ubutuli ubwa ndalama isi Beatrice Mwagomba andaghisye fiyo kasalala Mwalweni papo akasubilagha ukuti singabombiwa bo ukuya nulusako ulwa kwambilila ubutuli ubu papo syatula ukufyusya ubukyulusi bwake ubu ikubomba nukuti asumile Mwalweni ukukindilila ukubomba bo isi.
Paumaliksyo uyu ali mwimilile PGVH Katolola tata Nganasho Mwakanema atile ukwiyipa uku abombile kasalala Bilton Maunda Mwalweni syakuhobosya fiyo isi bati syosilondiwa ukuya dongosi.
Nukuti asumile abandu abakulondela ifinunu bope ukweghapo akaghaba ukutula abandu abafilema papo balimo bingi fiyo nkaya kabo.
Unsimbi-Austin Sute Kayisi