Ivi vyayowoyeka pa visambizgo ivi wupu wa Pamoza Tingakwaniska Youth wangunozga kusambizga wa chinyamata wa gulu la Malema 2 Youth Club naumo wangajipwelelela umoyo wawo kweninso na vya uchembele uwemi.
Pakuyowoyapo wa pachitengo wa gulu la Malema 2 Youth Club wa Maina Munthali wati wapapi wanji ku dela kwawo wakukanizga wana wawo kutola nthowa za kulera ivi wati vikuwika pachifyo umoyo wa wachinyamata kutola nthumbo zambula kunozgeka kweniso matenda.
Iwo watinso pala wakusambizga wachinyamata wanyawo pa nkhani za kulera wapapi wakuti wakusambizgana uhule kweni wati kwiza kwa wa Pamoza Tingakwaniska Youth navisambizgo ivi ku dera kwawo vyovwilenge chomene kuti wapapi watolepo lwande kuzomelezga wana wawo kutola nthowa za kulera.
Nukuti pakuyowoyapo muyowoyeli wa wupu wa Pamoza Tingakwaniska Youth wa Emmanuel Moyo wati kutandazga uthenga wa vya uchembele uwemi nkhwakukhumbikwa chifukwa wati
nivyaunenesyo nadi kuti wapapi wanji wachali wakupiliiska yayi vya uchembele uwemi ku wachinyamata nakuti nge wupu wa Pamoza Tingakwaniska Youth lekani wakunozga maungauno yakuti mafumu na wapapi wawengepo kusambilila lumoza na wachinyamata pa nkhani za uchembele uwemi.
Paumalilo GVH Mwakiyo uyu wanguwa mulendo wakuchindikika pa ungano uwu wati nge iye wakutolapo kale lwande kuchiska wachinyamata pa nkhani za uchembele uwemi ivi wapemphanso wapapi wa muzi wakhe kuti wakwenela kuzomelezga wana wawo kutola nthowa za uchembele uwemi kuti wajithaske ku nthumbo kweniso ku matenda.
Wupu wa Pamoza Tingakwaniska Youth wakugwira ntchito ya kuchiska wachinyamata kulondezga nthowa za uchembele uwemi na kujithaska ku matenda ya HIV/AIDS na ovwiri wa ndalama kufumila ku Breuckmann Foundation na boma la German
Wakulemba-Austin Sute Kayisi
