Pakuyoghoya na mulala wa wupu wa National Inniciative for Civic Education-NICE muchalo chino wa Gray Kalinde Kafe wati chakulata chawo chikulu kwiza muboma la Karonga changuwa kuti wazakapulike kufumira ku wa mama awo wakapikisananga nawo pa visola vya jumpha kuti wasange kuti waluske pachisola ichi chikachitika nchivichi kweniso kuti watondeka chikalengeska chivichi nachakulata chakuti wasange nthowa yakuwavwolira wa mama awo pa visola vya muchilimika cha 2030.
Wa Kalinde Kafe wati wa mama awa wasanga ungweru,kujikhwimiska mtima kweniso ubale na wanthu wakupambana pambana munyengo ya kampeni ivyo viwachiskenge kunozgekera makola kampeni ya visola ivyo vikwiza kuti wazakachite makola.
Pakuyoghoya na wamama wamoza awo wakwimilira nawo pachitengo cha ukhasalala kuchipani cha UDF Gloria Singini kufumira kuchigawa cha Uliwa ndipo walikutondeka wati Iwo wakawavya wovwili kufumira ku chipani.
Kweniso wati wanthu wanji wakaperekanga ndalama kuti wawasole ndipo walomba kuti muchitilo wakugawa ndalama panyengo yakampeni.
Paumaliro wa Tiwonge Chindamba wakwimilira chigwa cha Rukuru South awo walikupambana pa chitengo cha ukhasalala wati chidwi chawo chikawa kufikira wanthu pa ivyo wakukhumba kuti wazakawachitire ndipo wawonga wupu wa NICE pakuwapasa masambiro agha.
Wupu wa NICE ukugwira ntchito ya Nthawi yawo mumaboma gha Karonga,Chitipa,Neno na Salima na wovwili wa ndalama kufumira ku wupu wa UNDP.
Wakulemba Thom Tommy Nyirenda
