Isi sili bo ulu bo pakindile umwesi ghumowene apa Apostle Rabson Chiona abikile kangi ubutuli ku bakangale aba kwa mwalafyale Malema 2 ku ntemi uwa batemi Kyungu.
Pakuyobapo pakabalilo akakubika ubutuli ubwa sugar ku bakangale bakufwana 24 Apostle Rabson Chiona atile ikuya pakukindilila ukutula abandu aba kangale kulubafu ulwa kukindana kindana mwiboma ili nikyolondiwa ikya kupungusya indamyo isi bikwaghana nasyo pa bumi bwabo ubwa isiku ni siku.
Umwene asumile kangi abanyela ukweghapo kaghaba ukutula abakangale nukuti bati ikubomba bo isi papo aba kangale bikwaghana ni ndamyo isya kukindana kindana isi syo simo sikupela ukuti bitughale mwakutamiliwa.
Pakuyobapo yumo mwa bakangale aba bambilile ubutuli ubu Aida Kabumbila andaghisye fiyo Apostle Rabson Chiona nongwa iya butuli ubu nukuti bati isi bakasibonamo siku ku lubafu ulu ukuti ku batimi abangi ukuti babatule abakangale pakubambilisya ubutuli isi asumile ifipanga ifingi ukubomba bo ulu fyope.
Paumalikisyo umwalafyale GVH Kasewe atile kufwana na isi abombile Apostle Rabson Chiona kindu kyakulondiwa papo kikukasya abandu ukuti biputeghe kangi na ba kangale ukuti bitughale dutengano isi atile ku mbali iya banyela bingi bikutamya batikupilika isya bapapi Loli bikuya pakukindilila ukwitughala nabo pasi ukuti bayeghe bandu bakubaghindika abakangale.
Unsimbi-Austin Sute Kayisi
