Isi siyobiwe pa isya kuyobesania isi syaliko syatekesiwe ni komiti iya kitukuko iya VDC na banyafyale apa pali kangi uwa pakikota uwa kituko uwa ADC,Kasalala uwa kighaba iki nu mwimilili uwa kunyumba iya ndaghilo kulubafu ulu.
Pakuyoba na yumo mwa banyafyale James Chisi atile batendekisye isya kuyobesania isi ukufwana ni namyo iya mendelo papo usebo wabo ghonangike fiyo ifi bati fyo fimo ifi fikughomokesya nyuma utubombo utwa fitukuko.
Chisi atile ulu pope ikipatala kikuyengiwa ku kighaba iki bali nubogha ukuti pa kafikilo aka mikota linga kisile ukwighuliwa loli bati bikutisiwe na muno abalongosi aba baba mulile pa masyo agha sebo.
Pakuyobapo nu wapakikota uwa komiti iya Kilupula ADC Kingdom Malanga atile ukuya komiti iya kitukuko bikuya pakweghapo ikitukuko ikya sebo ughu ukwendela mu ndalama isya munyambi iya CDF papo abandu aba ku kighaba iki bikutamiwa fiyo pa masyo agha ndelo.
Nukuti umwilili uwa kunyumba iya ndaghilo kulubafu ulu Mungasulwa Mwambande andaghisye fiyo nubulongosi ubwa kwa Chisi papo bandu bakwiyumila pa fitukuko kangi nukuya nisya kuyobesania bo isi nukuti asimikisye ukuti usebo ughu ghukuya pakulimiwa.
Unsimbi-Austin Sute Kayisi
